Noullet Régnault, natif de Tournay, commencha son apresure le XVIIIe jour d’octobre l’an dessusdit avec Haquinet le Bacre, paintre. Lequel Noullet se partit de son maistre le VIIIe jour de février l’an nul CCCC. LXXIX [1480 n. st. ]. Et depuis se remit avec Philippot Truffin pour parfaire et aussi avec ledit Bacre; lequel a parfait son apresure.

A Philippe Voisin, paintre, pour marchié à lui fait de estoffer trois ymaiges estans en la devanture de la halle des dits doyens, avec l’escu d’asur, les fleurs de lis, hachement et deux angles, avec les escus de Tournay, lesdites choses estoffées selon la devise sur ce faicte, 98 lb. ; — item, et aussy pour avoir, oultre sadite devise et marchié à lui fait, estoffé d’azur et d’or deux encorbelures qui sont assises sur les tabernacles du Roy, de la Reyne et l'imaige du petit Dieu, qui ne devoit estre que de sinopre, et faict ung drap de soye vermeil devens ledit hachement, seméz de couronnes d’or, pour lesquelles choses a esté ordonné de grâce, 7 lb. t. ; — et pareillement à Philippe Truffin, Haquinet le Baccre et aultres juréz du mestier stil des paintres, pour avoir visité tout ledit ouvraige et en avoir fait le rapport, leur a esté ordonné pour leur sallaire quarante solz tournois.

Le iiije jour de décembre l'an mil vc iij, pardevant sire Gérosme Dennetières, prévost, comparurent les Pryeur et religieulx de l’ordre de Sainte-Croix en Tournay, d’une part, et Jehan le Baccre, pointre, demorant en la paroische Saint-Nicaise en ladite ville, d’autre part ; et congnurent lesdits comparans, meismement lesdits religieulx, d’avoir par cy devant marchandé audit le Baccre de faire et composer une table d’autel selon les devises par ci-devant entre eulx faictes et passées pardevant sire Gérosme Dennetières, lors prévost, le xvje jour de juing l’an mil iiijc iiijxx et dix sept, pour le pris et somme de trente livres de gros, que estoient tenus de payer lesdits religieulx audit le Baccre qui avoit promis faire et livrer ladite table auxdits religieulx à certain jour lors déclaré.

Le xxe jour de may l’an mil cincq cens et huit, pardevant sire Jehan Liébart, juré de la ville et cité de Tournay ad ce commis par messeigneurs prévosts et jurez de ladite ville, comparurent Jehan le Baccre, paintre, et Jossinne de le Fosse, sa femme, icelle auctorisée en ceste partie de sondit mary, et promirent, et chacun pour le tout, moyennant le pris et somme de seize livres de gros, en tant moins de laquelle somme ilz confessèrent avoir receu la somme de douze livres quinze sols de gros de Jehan de Wéz et Piérart Coppet, dit Bontemps, proviseurs de la chappelle S. Martin ordonné en l’église S. Martin en la ville de Saint-Amand, de laquelle somme ils se tinrent comptens et en quictèrent lesdits proviseurs et tous autres; ils promirent avoir fait et parfait certaine table d’autel pour ladite chappelle S. Martin, dont ils avoient fait marchié ensamble et avec lesdits proviseurs, et icelle livré à iceulx proviseurs endedens le jour S. Martin d'iver prochain venant.